本文重點
機會只係畀準備好嘅人，卓妮都好同意，好似立法會議員黃定光象哥同埋今日履新特首辦主任嘅譚志源，就係兩個好例子。我哋早前披露，象哥諗住做埋呢屆立法會後唔角逐連任，仲選定已故立法會議員許長青嘅公子許華傑同新任香港青年聯會主席陳仲尼做接班人，尋日象哥出席所屬政黨嘅籌款晚會時，親口證實所言非虛。
象哥話自己六十有多，係時候退下來，交棒畀年輕人。佢話當年未做議員時，幫過許長青競選，又喺佢議員辦事處做顧問，不論同業界、商會定其他議員都好熟絡，所以○四年一接棒就好快上手。
象哥深知培育新人嘅重要性，雖說依家距離下一屆選舉仲有三年，佢已準備帶埋兩位接班人多啲同商會、業界見面，等佢哋做好準備。至於最後邊個跑出，象哥就話要由業界同埋選民話事。兩位世姪真係要加把勁，唔好辜負象哥一番好意。
譚志源做定準備
同場仲有今日正式履新做特首辦主任嘅譚志源（Raymond）。Raymond雖然未上任，但尋晚已出席政黨籌款晚會，仲話已經同咗唔少政黨同議員打招呼。
Raymond又話，由於辦公室由政府總部轉咗去禮賓府，今日會返新辦公室收拾文件，將啲畫同盆栽安頓好，星期一正式開工。