早前有環保團體成功潛入政府合署西座，喺大樓外牆掛上幅印咗煲呔曾個樣嘅巨型橫額，仲寫上「氣候逃犯」四個大字，諷刺特區政府漠視全球暖化問題。行政署事後為咗幫煲呔曾遮醜，立即下令加強政府合署保安，所有訪客出入要登記身份證同電話號碼，市民想去西座嘅議員辦事處，要有職員落樓接送，令一眾議員同議員助理怨聲載道，最後搞到行政署長麥綺明要向立法會致歉，重新放寬保安安排。
事隔唔夠兩星期，行政署又再出招，花公帑喺西座所有樓層嘅電梯大堂安裝閉路電視，擺明將班議員同助理當賊辦，咬定有人放環保團體入去搞搞震；有關安裝工程已進入尾聲，議員反對都冇機會。
有議員助理話，政府最驚嘅唔係啲環保團體，而係嗰啲點都唔肯接受回購方案嘅死硬派雷曼苦主；萬一畀人哋潛咗入政府合署，做出一啲激進嘅行動，煲呔曾民望肯定又再創新低。其實閉路電視只可以幫政府事後緝兇，對防患未然作用不大，似乎政府關心嘅係自己嘅面子，唔係香港市民嘅福祉。