本文重點
煲呔曾早前雷厲風行大搞抗疫騷，雖然部分政策同實施過程笑話百出，最後亦阻止唔到豬流感襲港，感染人數每日不斷上升，但仍然意外地令特區政府民望止跌回升。煲呔曾食過翻尋味，最近改為大搞全民抗毒騷，推出一大堆成效存疑嘅措施，希望可以挽救自己喺七一後再度插水嘅民望。為咗幫煲呔曾做好呢場大龍鳳，唔少晨早預咗喺今個暑假外遊或者陪屋企人嘅公務員，都被迫取消休假返工，當中包括民政事務總署署長陳甘美華，真係黑狗偷食，白狗當災。
煲呔曾早前下令撥款九百萬元，畀十八區民政事務處大搞「青少年反吸毒社區計劃」，原意係想盡快搞多啲社區文康同教育宣傳活動畀啲後生仔，等佢哋唔好喺呢個悠長假期無所事事，繼而染上毒癮，或者做多啲個案，將吸毒嘅青少年救出毒海。可惜煲呔曾喺推出政策前未經深思熟慮，冇喺政府內部做好諮詢同部署，結果就爆出十八區民政專員有三分一都放晒暑假嘅鬧劇，令一眾區議員非常火滾，炮轟政府做騷快、做嘢慢。
分三次放成個月
其實部分正在休假嘅民政專員，只係放個零星期假，好快就返番工，對計劃嘅落實進度影響未必太大。反而陳太由六月中至七月底分三次放足差唔多成個月大假，就令十八區民政處面臨群龍無首、統籌乏術嘅局面，難怪陳太最後都決定取消原定喺七月下旬嘅假期，提早坐鎮民政事務總署主持大局。
不過有熟悉青少年吸毒問題嘅人士，就對呢個社區抗毒計劃成效有好大保留。首先今次毒潮同過往嘅唔同，好多吸毒青少年都係中產甚至富家子弟，只要佢哋自己願意，佢哋班家長絕對有能力安排一大堆活動，根本唔需要政府資助；至於教育宣傳更需要長時間做，唔係三時半刻就可以奏效。不過為咗陪煲呔曾做呢場大龍鳳，大家惟有取消休假即時埋位，陳太恐怕只係其中一個。