卿姐喺新書度搵咗幾個朋友寫吓佢哋眼中嘅劉慧卿，包括前商務及經濟發展局局長馬時亨同埋前教育局常任秘書長羅范椒芬，原來羅太同肥亨對卿姐嘅評價都唔錯噃。

肥亨形容同卿姐係「不打不相識」，因為一開始做官時卿姐成日都會鬧佢，但佢都讚卿姐係少數一開聲就令人精神為之一振嘅議員。不過肥亨就嫌卿姐份人太「悶蛋」，仲話佢除咗睇書就無乜娛樂，成日講嘢都係圍繞住工作同政治喎！卿姐尋日就似乎唔係太認同，笑笑口話只係肥亨節目太豐富，對比之下佢先至比較悶啫。為咗證明自己唔係悶蛋，卿姐透露前幾日先睇完由鍾景輝主演嘅《李察三世》話劇，兼且入埋後台同班演員影相添！

因教院風波離開政府嘅羅太，都係直性子。佢眼中嘅卿姐，係一個立場鮮明嘅議員，羅太仲讚佢為人實事求是，仲話好尊重卿姐是非黑白分明、對事不對人嘅處事態度，可以同佢直言不諱，比起笑裏藏刀，「講一套，做一套」嘅人好得多。不過就寄語佢多啲了解中國國情。