二○一二年特首選舉最近被炒熱，愈嚟愈多人噴口水花，「賭王」為疑似候選人開盤受注，「金勞詹」詹培忠就向行政會議召集人梁振英（ＣＹ）教路，點樣殺出重圍，反而基本法委員會委員劉迺強尋日提起ＣＹ，就表現得好疏離，話ＣＹ無問過佢攞意見，又唔肯評論ＣＹ勝算。劉迺強早前發起「香港再出發」宣言，ＣＹ仲係聯署人之一，佢哋嘅關係唔似咁淺喎。
ＣＹ最近咁活躍，盲嘅都睇得出佢嘅鴻鵠之志，劉迺強唔肯評論ＣＹ嘅勝算，只係話ＣＹ要跑出，「仲爭好多嘢」，包括選票喎，講咗等如無講！記者纏住劉迺強一輪，佢終於忍唔住出口幫ＣＹ，佢話有人指ＣＹ形象唔好，但係形象嘅嘢，好快可以扭轉劣勢，全國人大常委范徐麗泰係好例子，又話ＣＹ同潛在對手「唐唐」唐英年，北京都可以接受，手板係肉，手背又係肉，中央唔偏袒，反而見ＣＹ出嚟爭，北京會高興，因為可以提高未來特首嘅認受性喎。
劉迺強對呢場特首戰咁有見地，咁佢有冇向ＣＹ教路幾招呀？佢話無，尋日亦死都唔肯即場過幾招畀記者，話：「講咗出嚟，ＣＹ咪唔請我食飯！」