鄉議局主席劉皇發過去一年頻頻撲水，為沙田石門新大樓建造費籌款，近日已籌得近八千五百萬元，局方於是為大額捐款人士或機構制訂一套以設施命名嘅鳴謝方案，其中馬會就以四千一百多萬元認捐咗大禮堂、多用途禮堂及展覽館，而發叔就以三百萬元認捐圖書館。不過，最貴嘅中庭及其他多項設施，仍然有待善長仁翁認頭。
中庭命名值一千萬元，之所以咁貴，除咗面積大之外，旁邊仲有發叔個銅像坐鎮，保證捐款人個名字留芳百世。其他設施命名仲有三層中庭走廊，每條二百萬元、食堂及廚房各三百八十萬元、二樓露台二百萬元等，所有設施命名總值二億元，遠超過工程費一億三千多萬元，但仍有局中人建議倣效志蓮淨院推行一磚一瓦命名計劃，真係財源滾滾來。
除咗馬會呢個最大捐款機構外，新鴻基地產及恒基地產亦分別捐出五百萬元，命名兩間行政辦公室。至於捐出三百萬元嘅「玩具大王」蔡志明，休息室就用佢個大名命名。發叔又透露，新世界中國主席鄭家純初步答允捐出五百萬元，但未諗到畀邊項設施佢。