過埋九月就退休嘅金融管理局總裁任志剛，好可能退咗休都無得抖，事關立法會研究雷曼事宜小組委員會傳召任總嘅工作仲未完成，但係委員會打算八月放暑假，九月先開工，換言之任總退下火線後，可能要繼續上立法會受審。有議員仲話，下任金管局總裁陳德霖都唔應該放過添！
雷曼小組開始進行聆訊至今已經有五個月，足足有二十場咁多，期間財經事務及庫務局局長陳家強、任總同佢副手蔡耀君、證券及期貨事務監察委員會（證監會）行政總裁韋奕禮同埋企業融資部執董何賢通，都先後被傳召作供。其中被傳召過六次嘅任總係眾人之冠，不過佢喺五月最後一次作供嘅時候，仲有議員排緊隊未問完嘢，所以需要擇日再訊。
任總就退而不能休，佢嘅繼任人陳德霖亦好可能走唔甩。事關有議員覺得，陳德霖由九六年開始做金管局副總裁到○五年先走，而實行證券大法同雷曼迷債開始喺香港發售都喺○三年嘅事，陳德霖無理由可以置身事外呀！所以陳德霖返新工後第一樣要做嘅，好可能就係去立法會受審。