人稱「消委會一姐」嘅劉燕卿最知慳識儉，去到超市買零食時，特別留意營養標籤，又專吼減價貨出手，盡顯師奶慳家本色。不過原來佢亦有買錯嘢嘅時候。佢靜靜雞話畀卓妮知，佢買錯嘅唔係一包糖一對鞋，係大拿拿幾百萬嘅一間屋。

田少（中）揸住一百蚊，帶小朋友去玩具店狂買玩具。 （徐家浩攝）

田少出手買衫，都要太太提醒佢係着至好買。 （資料圖片）

話說劉燕卿年前睇中一個千七呎筍盤，一入到屋內就畀窗外嘅大樹美景深深吸引，於是扑錘用幾百萬買下，殊不知住落先知，原先好吸引佢嘅大樹，原來阻擋唔少陽光，令屋內變得較陰暗，嗰刻真係有啲唔開心，自覺做錯決定，好彩後來物色到另一間心水屋，將舊屋賣咗甩身，所以佢奉勸大家，睇樓要揀唔同時間，細心望清楚屋內同屋外，最好係帶埋家人幫眼喎。

田少外遊易入錯貨

田少亦自爆去旅行時最易買錯嘢，睇見靚衫就狂掃，返到香港就擺埋一邊唔着，連老婆都睇唔過眼，每次見老公出手，都一再提醒佢究竟會唔會着，田少話特別係紫色衫，佢買親都買錯，因為買返屋企一定唔着。

田少又透露，去街市買餸因為知名度高，買嘢反而唔及老婆平喎，所以佢唔行街市，最大嗜好仲係買紅酒，九○年曾一次過出手購入幾千支紅酒，珍藏近二十年後，酒價升值百倍。不過近年好少遇到心水貨，四年前孫仔出世嘅時候佢貪高興再買入一批紅酒珍藏。

田少另一嗜好，就係帶孫仔去太古廣場買玩具，佢笑言依家啲玩具只賣幾十蚊件，平到笑。聽佢咁講，當佢啲孫仔大個啲，買玩具貴啲，佢都一定唔會介意，孫仔孫女開心，佢就最開心嘞。

卓妮