《珠三角洲改革開放發展規劃綱要》尋日舉行交流會，內地多個省市嘅領導都有出席。規劃綱要其中一個合作重點係環保減排，所以各人發言時唔多唔少都提及環保議題，好似廣州市副市長陳明德就話，廣州市近年好注重環保，所以港商要喺內地投資，就一定要守環保規則。有份出席交流會嘅建築、測量及都市規劃界立法會議員劉秀成聽到陳明德咁講，都忍唔住話：「佢講得真係好，局長真係要聽吓！」但係就冇講明係邊位局長。

劉秀成話陳明德一番話令佢好有感受，因為佢覺得人哋講得出做得到，所有政策都以環保行先。但一講番香港嘅現況，劉秀成就火都嚟埋，佢話：「膠袋稅搞咁耐先收，連特首都畀人話係氣候逃犯！」劉秀成認為種種迹象證明政府推出政策時首要考慮嘅，根本唔係環保。

好可惜，煲呔曾尋日一致完詞就急急腳走人，根本冇留低聽陳明德嗰番足以令佢汗顏嘅發言，而被劉秀成唔點名批評嘅環境局局長邱騰華更加係冇出現，不過佢嘅副局長潘潔就聽足全程。潘潔回應劉秀成嘅批評時表示，政府一向都有做好環保工作，好似同珠三角地區合作減排、循環再造，又探討將內地嘅電動車引入香港等。

潘潔砌詞狡辯

潘潔雖然好似背書或者唱歌咁噏咗一大堆環保措施，但全部都係零散項目，缺乏整全計劃，同廣州市以環保帶動整體嘅做法有着天壤之別，睇怕特區政府今次出席交流會「取經」之後，真係要將陳明德嘅「分享」同劉秀成嘅批評好好反省。