今時唔同往日，依家香港已經吸引唔到內地人，偷渡嚟港嘅多數係南亞裔人士，佢哋嘅待遇好得多，唔使再閃閃縮縮，就算畀警察拉到，一樣奈佢哋唔何。呢嗱，水警尋日喺西貢以東嘅果洲群島附近海域，拘捕咗一批南亞裔非法入境者以及協助偷渡嘅「蛇頭」。呢批人蛇見到水警冇有怕，點解呢？原來佢哋個個有護身符。呢個護身符巴閉咯，話喺家鄉被政府迫害，要求政治庇護，真係掂吓都有罪呀，難怪警方最後都冇計，要轉交畀入境處跟進。

因乜事咁多偷渡客嚟香港？你估貪迪士尼樂園多嘢玩或者香港嘅空氣特別清新咩，佢哋就係想藉申請政治庇護攞張「行街紙」，再以難民身份打黑工，以超低價頂爛市，名正言順搶港人飯碗。

唔係啩，喺金融海嘯打擊之下，好多香港打工仔飯碗都打爛晒，點解眼白白睇住呢批假難民爭飯食都冇符，仲要趕極都唔肯走？

鬼咩，一日都係香港自己唔衰攞嚟衰，今年三月初高等法院裁定二十九名持有「行街紙」嘅南亞裔難民可以喺香港工作，而且仲指港府檢控佢哋非法留港，係錯誤以及屬於「非法羈留」喎。咁嘅判決即係為呢啲所謂「政治難民」打開中門啫，唔怪得佢哋有恃無恐喇，真係一百歲唔死都有新聞！

果然，消息一傳開，即刻引發連鎖反應，人蛇集團見機不可失，猛咁散播香港有特赦嘅謠言，引埋大批南亞裔人士以「一條龍」方式經東南亞國家以及內地屈蛇偷渡來港，攞番張「行街紙」，假難民真搵銀，攞正牌打黑工。

上月初之嘛，又有十六名南亞裔人蛇成功搶灘。據港府發言人指，外籍非法入境者人數今年一、二月每月平均有三十七人，但三至五月嘅平均數，居然大幅急升至一百三十六人，升幅超過二點六倍，絕對唔係講玩呀！咁搞法，香港要突破一千萬人口，話都冇咁易！

南亞裔偷渡客蜂擁而來，港府至如夢初醒咁話修例有迫切性，計劃將偷渡客接受僱傭工作列作罪行，但係執法部門只係識得勸喻僱主唔好請黑工，冇加重相關罰則，嚇鬼就得！

事實上，立法會議員幾年前已要求保安局為甄別程序立法，為難民提供人道協助如生活基本需要嘅同時，限制其在港打工嘅權利，好似話港府可以規定難民領食物券，但唔准喺港工作，弊在當局拖得就拖，遲遲唔肯立法。唉，連咁簡單嘅問題都搞唔掂，再咁落去，香港想唔陸沉都幾難！

計功夫茶話齋，如果港府再唔修例堵塞漏洞，香港好快變成國際偷渡大都會，話唔定日前廣州非洲裔黑人衝擊派出所呢啲大場面，香港日日都有得上演呀！