特首辦主任易主，咁啱前特首辦助理處長陳羿去完哈佛大學深造回港後，最近亦獲安排落北區出任北區民政事務專員，而政府尋日亦刊憲，委任小Donald做太平紳士。聽聞小Donald今個星期已開始出席北區區議會轄下委員會會議，熟習開會運作，從旁協助即將調走嘅現任專員、前保安局首席助理秘書長黃宗殷，兩人逐步展開工作交接。
稱得上「地區專員」，即係乜都要理，乜都要管，仲要平衡議會內外各方利益。有地區人士坦言，北區未來幾年最難搞，事關有多項重點規劃，包括蓮塘新口岸、新界東北及河套區發展等，涉及嘅事務多不勝數，工作絕不簡單，對於沒有地區工作經驗嘅小Donald來說，好聽啲就叫做磨練或挑戰，唔好聽就等於接過燙手山芋，做得唔好隨時變「急凍奇俠」，有排都唔使旨意升職。