究竟理想嘅退休生活係咪就係得閒打吓golf、坐郵輪遊吓埠呢？外號「黑英」嘅前天文台台長林超英，就選擇退而不休，依家佢喺一間香港普通話研習社幫手，做咗理事會主席，除咗做吓啲日常行政管理工作，間中仲兼任導師教幾堂普通話，而且唔收錢添。大家都知道黑英英文好流暢，原來佢普通話一樣好掂。尋日喺中環撞到黑英，佢話當年天文台除咗係政務官職系外，仲係第一個引入普通話班嘅政府部門。黑英同普通話咁深淵源，唔怪得無人工都肯去幫手啦。
黑英嘅普通話叻到可以開班授徒，原來下過一番苦功，佢用純正嘅普通話透露，秘訣就係「啃字典」。讀咗字典幾年，黑英終於練成一口流利普通話，唔怪得當年天文台台長上北京交流，都要搵佢做即場翻譯啦！
除咗識教語文，黑英仲教埋做人道理，佢久唔久就會返母校香港大學同班師弟師妹交流，勉勵佢哋千祈唔好當自己仲係讀緊中學，乜都要等人幫、等人教，應該學識點樣去自我啟發，要保持番啲熱情同激情喎！