民政事務局及民政事務總署在眾多政策局中算係好做，點解咁講呢？因為啲高官經常可以放長假，閒閒地放超過一個月，好似民政事務總署署長陳甘美華咁，去年底放完一個月大假後，呢兩個月又分三階段放假。政府憲報尋日又公布，民政事務局常秘尤曾家麗會在下周二起放個幾月大假，一直放到八月底暑假完結為止，期間由副秘書長朱曼鈴（Cathy）署任。
Cathy署任個幾月，按規定署任嗰個月可以攞到肥尤D8級二十萬元薪酬，較本身D4級十六萬元薪酬多出四萬元，聽落都幾和味。不過，難得放暑假，相信好多人都希望外遊輕鬆吓，拍拖嘅拍拖，無拖拍就更加想搵拖拍，依家Cathy硬頂肥尤個位個幾月，眼白白同暑假講Bye Bye。肥尤無交代放大假去邊度，話唔定因為要備戰十二月東亞運動會工作，所以放假早啲抖定都唔出奇。