已故華懋集團主席龔如心千億元遺產官司已經審理完畢，現正等候判決。一直胸有成竹嘅華懋掌舵人龔仁心，本周三約咗幾個朋友到香港會食午飯，卓妮問佢對官司有冇信心，點知佢更有自信地反問：「你話呢？你覺得有冇信心吖？」雖然龔仁心個額頭好似鑿住「必勝」兩個字，但卓妮又點敢亂講吖，話晒單案都仲未判。
回顧過去幾個月嘅官司，龔仁心承認感到一定壓力，但佢話自己識得減壓，盡量將工作安排得好啲。距離判決仲有兩個多月，本身任職醫生嘅龔仁心話，等候判決期間仍然會返青龍頭間診所睇病症，因為好多病人都係佢嘅好朋友，有需要一定會幫佢哋睇病，最多睇少啲症嘅啫，但遲啲就唔知嘞！
龔仁心忽然爆肚，話唔知遲啲係咪繼續應診睇症，唔通想暗示稍後會返華懋集團掌權？不過，呢個暗示能否落實，都要取決於爭產官司勝負與否，都係嗰句，呢個「暗示」充分反映龔仁心對贏官司充滿信心。
卓妮