呢嗱，遍布全港嘅板間房，咪就係港式貧民窟囉，一個單位好似豆腐咁樣開十件八件，最多可以十一件。點解唔可以有十二間板間房？哦，係咁嘅，根據《床位寓所條例》，一個單位超過十一個宿位就會受到監管，聰明嘅業主咪走法律罅囉，只要唔超過十一間，冇人理㗎。

港式貧民窟密密麻麻，豆腐膶咁細嘅地方，轉個身都有難度，諗都諗到有幾咁唔舒服。本來都算嘞，鬼叫你窮呀，頂硬上。之不過咁，除咗唔舒服之外，板間房其實仲係非常極之十分危險嘅地方，一個唔覺意，燒到一鑊熟！

前幾日之嘛，尖沙咀彌敦道海防大廈發生奪命三級火，造成一死八傷。事發現場原來係缺乏監管嘅「影子賓館」，裏面又係密密麻麻開好多板間房，結果燒到一發不可收拾。

咪住先，《床位寓所條例》就話唔適用於普通私人樓宇出租單位嘅板間房啫，賓館理論上係要向民政事務總署領牌喎，點解又唔受監管？起碼要符合消防條例吖。問題就喺呢度嘞，民政事務總署固之然係懵盛盛，事前根本唔知火燭嘅係無牌經營嘅「影子賓館」，至於消防處咯喎，佢哋話淨係負責大廈公眾地方嘅走火通道，單位裏面就唔關佢哋事。換言之，全港所有板間房都唔會受到消防處監管。

消防處唔理，屋宇署可唔可以理？對唔住，由於板間房冇改變樓宇結構，所以屋宇署都唔會理。

嘩！真係講出嚟都冇人信，你以為九龍城寨三不管嘅舊時代已經過去咩，原來板間房仍然係三不管，消防處又不管，屋宇署又不管，即使變成賓館，民政事務總署同樣係不管！

等功夫茶話過你知板間房嘅潛在危險有幾高。貧民窟吖嘛，梗係慳得就慳㗎啦，所以家家戶戶用嘅煮食工具係最廉價嘅火水爐，假設一個單位有十一間板間房，即係有十一個火水爐。打瀉一個火水爐已經話都冇咁易，家陣有十一個機會畀你，呢家嘢唔係叫做易過借火，而係易過放火！

除咗火水爐夠晒牙煙之外，電插頭一樣頭痕。板間房通常只得一個電插頭，住戶最鍾意用萬能插蘇玩疊羅漢，一個疊一個，一個疊一個，閒閒地疊十個八個。危險成咁，平時唔好諗住開窗喎，撇少少雨你都分分鐘變燒豬。

唔開窗又有另一個問題，熱吖嘛，焗吖嘛，板間房變蒸籠。○七年荃灣有一位板間房住客，瞓喺床上面都可以中暑，結果，死咗。

唉，講講吓，功夫茶心肝仔開始卜卜跳。七月炎炎天氣酷熱，百萬窮人無處容身，唔知有幾多人最終落戶板間房，更加唔知有幾多人最終一鑊熟。好心曾蔭權諗吓辦法啦，又話「民心我心」，呃細路咩！