坊間最近唔少人都呻笨，後悔唔走去學風水。立法會建築、測量及都市規劃界代表劉秀成，原來係立法會嘅隱世風水師，最近喺龔如心千億元遺產案中作過供嘅風水師余若愚，更加係劉秀成嘅同窗。尋日佢自爆，其實佢做建築師無幾耐就去咗學風水，仲試過去禮賓府（即前港督府）幫當時嘅港督尤德睇風水添！
劉秀成話，做建築嘅好多都識風水，事關風水其實都係一門好科學嘅學問，甚至稱得上係非物質文化遺產，而佢就係做咗建築師無耐，就去拜師學藝，不過佢學嘅都只係最簡單嘅睇羅庚同埋「九宮飛星圖」，依家就連風水師傅個名都已經記唔起。至於余若愚，劉秀成話係佢讀喇沙時嘅中學同學，數學非常好之餘仲精於《易經》。
劉秀成憶述，有一次佢去前港督府同港督尤德見面，尤德問佢，滙豐銀行總行重建，會唔會對佢有影響。劉秀成當時話畀尤德知唔緊要嘅，但原來佢心裏面唔係咁諗，風水先生講嘢，就梗係避重就輕，婉轉啲，可能佢乜都未學到，就學到呢樣。冇幾耐，尤德就喺北京就香港前途談判期間心臟病發逝世。