香港律師會會長王桂壎上任兩個月，活動一浪接一浪，唔少係幫助弱勢社群、為慈善團體籌款，似乎想一洗律師只係識賺錢嘅感覺。王會長話，律師會早前喺元朗區搞咗個為期半年「師友計劃」，搵嚟一班年輕律師同當區同學交流；嚟緊呢個星期日會搞個廚神大賽，為慈善團體籌款。
呢個律師廚神大賽已有十七隊由律師同慈善團體組合參加，每隊有四人，分自選同指定菜式，齊齊煮飯仔。廚神大賽評判除咗有王會長，仲有高等法院上訴法庭法官胡國興同埋名廚楊貫一等等，位位都好有分量。不過評判厲害唔等於參賽者煮得好食，王會長講笑話，已準備好保濟丸、止屙丸傍身，有備無患。王會長話以前喺英國留學，點都要識煮兩味小菜，今次本來諗住搵埋個司長級高官齊齊整場示範賽，但之後要趕去台灣訪問，惟有作罷。
王會長本周日晚將率團去台北，同台灣律師公會、台北律師公會、司法院院長賴英照同台灣仲裁會等會面，佢話港台律師會正式交流係佢記憶以來嘅首次，得來亦不易，事關律師會○五年已搞咗個兩岸三地高爾夫球比賽，用運動開始第一步，最後促成今次歷史性訪問。