立法會休會在即，做咗一年議員嘅前高官葉劉淑儀尋日請議員同記者食壽司，仲講起煲呔曾前日喺答問大會嘅表現。葉太第一句就讚煲呔曾學到嘢，唔似上次「代表論」咁多口搞到講錯嘢，今次連講幾次「我無嘢補充」，穩穩陣陣；不過葉太話成個答問大會沉悶不堪，煲呔曾唔似美國總統奧巴馬咁有魅力，可以鼓舞人心。將煲呔曾同奧巴馬比，葉太認真識講笑！
講完煲呔曾，葉太再同大家點評一眾跑馬仔嘅疑似特首候選人。佢話曾經同佢係同事嘅政務司司長唐英年太錫身，次次都迴避問題，好似樹木保育咁，一唔識答就推畀發展局局長林鄭月娥，好少親自上陣，上次親身上陣嘅包機事件又做得唔好喎。
講完唐唐輪到鬍鬚曾。葉太做保安局局長時，曾俊華仲係海關關長，算係半個下屬，葉太嫌鬍鬚曾太「弱雞」，成日被議員砌，仲話自己私下同鬍鬚曾講過添，唔知當時鬍鬚曾有乜反應？至於頻頻出動嘅行會召集人梁振英呢，葉太初時唔肯評論，大家磨多兩磨，佢先至話：「呢個不便評論，只可以話佢好努力。」葉太似乎對CY特別手下留情。
問到佢自己會唔會出嚟爭特首寶座，葉太淨係自嘲，答咗等於冇答：「我邊有咁嘅本事，身家唔夠厚、無父蔭、內地又唔識咁多上海人……」句句都衝着出身名門、上海話了得嘅唐唐而來，莫非視唐唐為勁敵？葉太嚟緊會同囡囡去布吉島旅行，事關囡囡喺美國東岸讀書，當地成日落雪，咪搵個有陽光海灘嘅地方同囡囡過暑假。