事緣本年二月，帳委會對公眾街市管理作出一系列建議，之後食環署就執住份報告內話要同街市租戶簽訂新租約呢點，向商舖「開刀」，租金、差餉、冷氣費樣樣都要加，結果引起商戶強烈反對，食物安全及環境衞生事務委員會即時叫停簽新租約行動。點知梁卓偉喺委員會上發難話：「你哋今日委員會講一套，帳委會又講另一套，令我哋無所適從。」同時係兩個委員會成員嘅梁家傑即時還拖：「我依家明白畀人屈嘅感覺係點喇！」梁家傑解釋，帳委會嘅報告重點係要當局先理順街市角色、政府資助和活化等問題後，才考慮簽訂新租約，有關政策要等到下星期先開始傾，但當局竟然先斬後奏藉報告趁機加租，仲要撻帳委會嘅朵嚟逃避責任，怪不得梁家傑話被屈。

副局政助 常被投訴

自從政府加開副局長同政治助理之後，負面新聞不絕於耳，好似商務及經濟發展局副局長蘇錦樑就有卡片事件；教育局副局長陳維安就被投訴太太喺小學停課之際，仲要求學校為愛子搞小學畢業禮；環境局副局長潘潔就喺立法會改善空氣質素小組委員會上十問九不知，余若薇向內會主席投訴佢。

今次梁卓偉破天荒畀議員直接向政務司投訴，其實早有端倪，好似早前佢向立法會申請三億撥款做抗疫工作，佢連製造到幾多就業、人工幾多等基本資料都答唔出，但「老馮」要議員批錢；上月鯉魚門抽海水事件，佢又畀議員話只係睇水辦含菌量，堅持立場漠視商舖死活，更加辣㷫班議員。今次佢就連一向同政府關係唔錯嘅政府帳委會主席黃宜弘都唔畀面，搞到成個委員會投訴佢。睇嚟梁卓偉除咗要保住人氣外，仲要加把勁改善人際關係先得喇！