功夫茶講嘅係真真正正嘅蚊，會吸人血嘅惡蚊，會傳播日本腦炎同埋登革熱嘅毒蚊。你知啦，尋日啱啱係二十四節氣之一嘅「小暑」，代表天氣十分炎熱，正係蚊蟲孳生嘅旺季。你對毒蚊仁慈，即係對自己殘忍，所以咯喎，殺殺殺殺殺殺殺！

咦，本報收到一單投訴，睇下係乜傢伙先——

葵盛東邨盛興樓有一位麗姐話喎，佢屋企依山建築，山坡雜草叢生，每年踏入夏季即受蚊患滋擾，點晒蚊香㗎嘞，依然叮到手腫腳腫，麗姐批評房屋署冇做好滅蚊工作。

咦，仲有另外一單投訴，又睇下係乜東東先——

葵興邨梁先生發現，邨內興樂樓對出行人通道上蓋積水，懷疑去水位被垃圾阻塞，所以孳生蚊蟲。梁先生仲話呀，佢向食環署反映啦，點知食環署話行人通道屬於路政署管轄範圍，所以交咗畀路政署處理；隔咗一日之後，路政署又話嗰度係房屋署管轄範圍，所以又交咗畀房屋署處理。換言之，梁先生變咗一個人球，慘遭政府部門一個二個踢來踢去。

計功夫茶話齋，呢啲咪就係典型嘅官僚作風囉，如果唔係，政務司司長唐英年都唔使臨危受命，做一個跨部門嘅「全港管樹大隊長」，以防各自為政之下再有塌樹殺人。

既然兩單投訴都來自葵涌，咁就死火嘞，證明葵涌的而且確係蚊患重災區。根據食環署今年五月嘅統計，誘蚊產卵器平均指數大幅上升，三十八個地區之中，指數最高嘅係新界西嘅元崗以及葵涌，分別達到百分之二十五以及百分之二十二點四，進入警戒範圍，市民必須提高警覺。

唉，淨係呼籲市民提高警覺有鬼用咩，官僚懶到出汁，明知葵涌係蚊患重災區，仍然唔肯加強滅蚊工作，一味大腳傳中，將蚊患問題左交右傳。官方宣傳都識得咁講啦：「齊來把蚊滅，預防日本腦炎登革熱。」可惜吖，咪就係得個講字囉，做起上嚟咯喎，個個變晒大懶蟲。

反正潮流興跨部門協調處理，除咗唐唐係跨部門管樹大隊長之外，曾蔭權尋日又自封為「全港掃毒大隊長」，誓神劈願話要率領司長局長同心合力對抗毒禍，挽救毒海沉淪嘅學生哥咁話。不如咁嘞，曾蔭權順手委任一個「全港滅蚊大隊長」，唔止係，殺得一蚊得一蚊；更加要，捉得一蟲得一蟲！

殺蚊大家都明白，係要預防日本腦炎登革熱，捉蟲又係為乜呢？哦，就咁，你想消滅蚊患吖嘛，梗係需要政府部門勤力工作㗎啦，所以咯喎，全港滅蚊大隊長嘅重要任務之一係捉懶蟲，捉走晒政府部門嘅大懶蟲！