手舞足蹈非常投入

尋晚嗰場係甲一組男子籃球季後賽總決賽，賽事採五局三勝制，永倫之前已領先南華二比零，尋晚個場可以話係永倫嘅決勝局賽事，只要贏咗就可以捧走今年冠軍盃。外表斯文嘅龔仁心識唔識打籃球，真係要問吓佢本人先知，但尋晚佢特登為球隊撐場，好明顯係因為永倫嘅班主就係當今華懋集團董事兼集團總經理許業榮，自己人當然要撐自己人啦。

話說球賽原定夜晚八點半開始，但龔仁心一早已經到場，仲同永倫嘅粉絲一齊坐響觀眾席第一排。雖然許班主唔可以陪佢一齊坐，但都無損佢睇波嘅雅興，比賽進行期間一樣鬼咁投入興奮，仲又不時揮動手中打氣棒，十足十標準籃球迷一樣。

不過，尋晚見龔仁心睇波期間經常手機響起，都難怪嘅，爭產官司家陣進入高潮，佢好多事都要兼顧，想全副精神投入睇波輕鬆吓都唔係咁易。