全國政協常委陳永棋相識滿天下，尋日出席喺會展嘅寧波服裝推介會，一樣巧遇老友，今次仲係多年冇見嘅師姐、已故船王包玉剛長女包陪慶（Anna）。兩人原來同屬美國Purdue University舊生，棋哥修讀工業工程，Anna就主修心理學及社會學，不過棋哥入學時Anna已經畢業，兩人各自返香港後出席舊生活動，先知同對方咁有緣喎。
講起喺美國讀書時嘅趣事，棋哥話由於家族從事製衣生意，畢業後曾留喺美國學維修衣車，所以佢唔單止識車衫，衣車壞咗都難佢唔到。棋哥及後返港發展，加入阿叔陳瑞球揸Fit嘅長江製衣，雖然有阿叔照住，棋哥一樣要由低做起，第一份工作係做量布員，負責將長度相近嘅西裝布料歸類，方便工人車衫。棋哥笑言當年抬布力大如牛，今時今日發福咗，一定抬唔郁喎。
棋哥大半生同製衣有緣，平日着衫亦指定搵上海及寧波師傅訂造西裝及恤衫，棋哥自嘲身形又肥又矮，周圍都買唔到啱心水嘅西裝，所以除咗底衫褲外，所有上班服都係度身訂造。