中投新成立嘅十四人智囊團，全屬國際財金專家嘅星級人馬，港人比較熟悉，除咗肥亨之外，仲有前國家副總理曾培炎、前證監會主席沈聯濤同中大校長劉遵義。中投係國務院屬下機構，負責為中國巨額外匯儲備尋找投資出路，可惜投資業績唔算突出，所以今次設立國際諮詢委員會，請嚟十四位猛人助陣，國務院都非常重視，喺剛過去嘅星期日，就由負責財金政策嘅副總理王岐山請大家食飯，畀足面子。

中投坐擁二千億美元資本，即約一萬六千億港元，曾經叱咤投資銀行界，又做過特區財金官員嘅肥亨有份幫手出謀獻策，點計都算係一份榮譽。中投嘅資金係人民嘅血汗錢，希望中投有咗呢個十四人智囊團，可以如虎添翼啦。