民主黨立法會議員黃成智近月醜聞不絕，先在四月被揭發在立法會選舉期間虛報職業為註冊社工後，五月又涉違規濫用區議會資源搞立法會活動。事隔一個多月，黃成智尋日無公德兼無交帶，卓妮見佢出席曾蔭權答問大會時，為求自己方便，大模廝樣將私人座駕停泊在立法會停車場通道，嚴重阻塞其他車輛出入。
答問大會三點舉行，好多團體中午就到場請願抗議，令立法會停車場兩旁擠得水洩不通，只留下中間一條狹窄行車通道讓車輛進出。大約兩點半，黃成智駕車駛進停車場，由於前面有車未開出，加上車位已泊滿，佢於是停車熄匙，放低條車匙喺保安更亭，粒聲唔出就走咗入立法會，完全當正係食肆「代客泊車」。
賴趕時間車匙留更亭
因為黃成智架車阻住條路，令尾隨幾輛車塞住郁都唔郁得，其中一輛就係鄉議局副主席張學明嘅座駕。有保安員見勢色唔對，擔心阻礙尾隨高官車輛進場，遂衝入立法會搜尋黃成智。另一邊廂，有保安員發現黃成智放低咗條匙喺更亭，於是立即將佢部車先駛離立法會，兜個圈折返再泊好架車，過程擾攘咗幾分鐘。
斥保安唔知頭唔知路
黃成智事後解釋，當佢駕車駛入停車場後，畀廠商會立法會代表林大輝座駕頂住，出口又有警員封路，因為趕時間，於是就放低架車同車匙，然後入立法會放低個公事包，直至接獲保安員通知佢架車阻路，佢諗住出去駛走架車時，發現保安員已經代佢泊好架車。
根據立法會秘書處安排，如果立法會停車場泊滿，議員可以駛到下亞厘畢道政府總部停泊，但就要勞煩議員花五分鐘步行返回立法會。雖然無證據話黃成智因為懶，所以冇將車駛到政府總部，但隨便亂泊車就反映佢無公德，放低車匙又無交帶，難為佢事後仲斥責保安主管「唔知頭唔知路」，保安員又唔係佢肚裏面條蟲，又點知佢想點呢？
卓妮