每次答問大會，社民連三子都以玩謝煲呔曾為己任，三人尋日連環抗議，煲呔曾三次開口發言，先後畀長毛梁國雄、大舊陳偉業同黃毓民打斷，搞到佢極之冇癮。

長毛指住煲呔曾大嗌：「劫貧濟富」。

陳偉業為雷曼苦主向煲呔曾抗議，塊面有佢件衫咁紅。

尋日當煲呔曾步入議事堂，長毛梁國雄即刻大嗌：「劫貧濟富」，然後攞住個寫住「雷曼苦主跳樓死，無能高官攞勳章」嘅示威牌，直衝煲呔曾，最後被保安攔截。立法會主席勸長毛返埋位無效，隨即宣布暫時休會。

兩分鐘後復會，煲呔曾想開口講嘢，陳偉業又發難，企高大嗌抗議雷曼風波口號，嗌到滿面通紅，結果又被請離議事堂。好快議會第二度復會，呢次輪到黃毓民出手，佢一言不發衝出位，將個抗議紙牌怒擲喺煲呔曾面前嘅枱面，場面一片混亂，社民連三子連環搞事，前後擾攘約十分鐘。

被指罵「逃犯」「殺人犯」

煲呔曾被社民連三次「封口」，其後發言條脷全程打晒結，將「戒毒下游工夫」講成「下流工夫」，「對毒品宣戰」變「對毒品宣傳」，連佢○七年嘅參選宣言「香港新方向」，都講錯做「香港新方案」。煲呔曾突然口窒窒，可能係眼見議事堂滿目都係抗議自己嘅紙牌，所以理虧心虛啦。

事關尋日大部分泛民議員都喺枱面放上抗議煲呔曾漠視處理氣候變化問題嘅「氣候逃犯通緝令」，甘乃威嘅抗議紙牌仲激，寫着「殺辛婦者，曾蔭權！」對煲呔曾痛詆狠責一番。特區最高負責人被人喺議事堂公然指罵係「逃犯」同「殺人犯」，唉，弱勢政府，沉淪至此，都算悲哀！

煲呔曾想攞尾彩，當立法會主席宣布散會之後，佢突然要求加插發言，暗寸社民連三子搞事，唔守規矩，搞亂廿幾年來都係包容同理性嘅立法會，不過，佢事後被泛民寸番轉頭，話個會完咗仲要求發言，同長毛一樣，都係唔守規矩。