呢嗱嗱嗱，尋日之嘛，有大約一百個領匯轄下商場以及停車場嘅保安員，拉大隊去到黃大仙領匯總辦事處，抗議「三更制」轉為「兩更制」。

所謂三更制，即係一日分三更，每更八小時，如果改成兩更制，等於每人每日要做足十二粒鐘。無端端搞乜鬼轉制？唔到你唔服，領匯玩陰毒，工時長咗咯喎，人手唔使咁多，咪可以狠心裁員囉。領匯員工好不滿咁話，改制之後一係面臨炒魷危機，一係變相減薪，因為工時多咗，時薪由二十八蚊減至二十三蚊。

吖，話時話，警務人員見到領匯員工咁悽慘，會有乜嘢感想呢？人哋不滿嘅係裁員減薪，警察不滿嘅係冇得加薪，仲要食住上爭取另設一套獨立薪酬架構。曾蔭權就好啦，成家都係警察，領匯保安員只可以咁樣講：我係來自一個保安家庭，我嘅父親係保安，我嘅細佬係保安，我嘅弟婦係保安，我嘅叔叔係保安，我嘅表兄弟亦有當保安嘅，所以我對於窮等人家朝不保夕嘅悲慘生活有好深刻嘅體會。

今時今日經濟不景，如果老闆蝕到入肉而被迫裁員減薪，咁就真係無話可說。之但係，領匯其實好叻仔㗎，佢哋冇蝕錢，反而賺到笑。賺大錢仲要玩陰毒剝削員工，領匯應該有資格榮膺全港無良僱主冠軍。

領匯舊年盈利十八億，簡直係鶴立雞群嘅逆市奇葩。領匯到底有乜嘢發財秘訣嘅呢？其實方法好簡單，佢哋逆市加租，不斷咁加，起勢咁加，加到好多商戶頂唔順無奈執笠。至於停車場，同樣係加加加，加到好多車主頂唔順上街示威。

即係咁，領匯先以無良手法牟取暴利，完全冇負上應有嘅社會責任，然後再以無良手法剝削員工，賺到錢竟然裁員減薪。所以話啫，無良僱主冠軍呢項殊榮確係無人能及，領匯捨我其誰。

講真，一個人每日工作十二粒鐘，點頂呀？成日都有新聞話職業司機死捱爛捱，結果搞到瞌眼瞓車毀人亡，保安員如果過度疲勞瞌眼瞓，領匯商場容乜易變咗盜賊如毛㗎？停車場會唔會變咗偷車樂園㗎？估唔到二十一世紀嘅香港，居然仲有日捱十二粒鐘嘅廉價奴工。請注意，係奴役個奴，唔係勞動個勞。

講到呢度，功夫茶開始有少少未卜先知嘅特異功能，唔使同佛祖傾偈都可以預計得到，七一遊行肯定人頭湧湧。冇辦法，一字記之曰飯，左邊冇得食，右邊一定反。家陣失業大軍二十萬，貧窮人口一百萬，公僕團體又唔肯共度時艱，無良僱主更加係落井下石，反正都冇工開咯，梗係上街啦！