前會計界立法會議員譚香文（Mandy）早前高調退出公民黨，當時已經不點名炮轟咗公民黨一輪，佢喺即將出版嘅一本新書裏面，更加點名數臭公民黨多處不是，包括佢畀一名黨內「專業高層」搞喊嘅秘聞。睇嚟「君子交絕，不出惡聲」呢句說話，依家已經唔再流行。
至今仍然雲英未嫁嘅Mandy，喺書中用「第一春」同「許配」嚟形容自己喺○六年三月加盟當時啱啱創立嘅公民黨，點知兩個零月後，就爆出一位黨內嘅「專業高層」同幾位有意參選區議會嘅黨員，喺記者面前大數佢嘅不是，最後連執委會都要開會討論事件，期間佢仲開開吓會忍唔住喊着衝出會議室。譚香文口中呢位「專業高層」，矛頭直指本身係資深大律師嘅公民黨立法會議員湯家驊。
Mandy喺書中又不點名踢爆本身係會計師嘅現任公民黨司庫容詠嫦，描述呢位當年同佢爭位出選立法會嘅容詠嫦，點樣用盡方法阻撓佢角逐連任。
最後更點名狠批公民黨「形象高調，回應低調」、「不食人間煙火」、予人「藍血人」同「高高在上」嘅印象等，其中一個經典例子，就係喺立法會選舉投票日，用直升機接載「民主阿婆」陳方安生拉票嘅荒謬行徑，最終令佢下定決心，同呢位曾寄以厚望嘅「好歸宿」同「夫君」分手。