語常會主席田北辰今日卸任，尋日搞咗個臨別秋波同傳媒見面。自稱阿田嘅佢前排就教學語言「微調」政策同教育局局長孫明揚隔空開火，尋日大家都好關心佢同政府今次係咪不歡而散。阿田話佢同孫明揚關係好好，但係佢估計孫公喺「微調」事件可能心入面會有少少唔舒服，自己都好同情佢喎！
田二少話，當年係前教育統籌局局長李國章話搵唔到合適人選，覺得佢啱做先搵佢，又話唔想畀人話厚顏無恥，所以一定要走。但係佢又拋低一句，話自己已經五十九歲，應該讓啲機會畀啲四十幾歲嘅人，明寸繼任人程介明已經六十幾歲，老過自己。
田二少到咗任期嘅最後一日，仍然不忘推銷母語教學，佢話母語教學本身係苦口良藥，明白唔係個個都支持，而且提升學生英語水平係政府高層意願，好似明白負責「微調」嘅孫公其實都有佢嘅苦衷。不過講起「普通話教中文」佢就特別開心，因為調查發現，接受「普教中」的小三學生，普通話水平已經好過一啲無接受「普教中」嘅中三學生，「普教中」可以話係佢任內得意之作。