施榮忻獲黃永光激讚
卓妮八到，黃永光慷慨借出家族旗下酒店搞座談兼晚宴，為菁英會出錢又出力，但佢作風低調唔認叻，反過來讚施榮忻係「香港未來之星」。咪睇黃永光生於大富之家，佢自爆鍾意體察民情，年前曾跟隨前行會成員陳智思到訪深水埗板間房，早前又帶班「菁英會」成員上廣州考察內地新建公屋，印象最深係見到內地公屋間隔比香港寬敞，有園景又有泳池，正過香港嗰啲多多聲。
同藝人傅明憲傳緋聞嘅莊家彬（Albert）呢晚撇低女友招呼嘉賓，巧遇前去撐場人大常委范徐麗泰嘅公子范駿華，老友鬼鬼搭膊頭合照，原來兩人做過舊同事。
范駿華係莊家彬師兄
話說Albert○三年底喺美國Tufts Universtiy讀完經濟學返港後，加入四大會計師樓之一嘅羅兵咸會計師事務所，咁啱被安排同駿華一組工作，駿華比佢早幾年入去，做咗佢嘅「Table Coach」，負責教佢做嘢。Albert難忘當年幫一間公司搞上市忙到天昏地暗，由朝早八點做到凌晨兩、三點，踩足幾個月，經過地獄式訓練，練得一身好武功，依家喺家族企業負責地產兼睇數，大派用場！
梁宏正都話自己唔係少爺仔，喺英國讀完經濟返港後，主力協助家族打理惠州毛衣廠房，管理過千員工，平日要親自去巡廠，生活絕不優閒。
卓妮轉頭見到行會召集人梁振英(CY)，問佢近日積極參與警隊職方協會召開嘅諮詢答問大會，係咪受當差嘅爸爸影響，CY即時劃清界線，話唔想講太多警察子弟身份，擔心咁樣唔夠持平。咁講法，莫非係想暗寸日前走出來開腔大晒自己喺警隊家庭長大嘅煲呔曾整色整水？
尋日就職禮前曾發生一段小插曲，話說大會請咗中央財經領導小組辦公室副主任唐仁健主講三農問題期間，台下突然有位菁英會成員彈起身發出呀呀叫聲，雙手不停抽搐，更一度出現「翻眼」現象，嚇到在場嘉賓目瞪口呆，急急扶佢埋一邊休息，呢位仁兄嘅名牌寫着「柯百利」，據聞係前恒生大班柯清輝公子柯百利，幸好見佢休息廿多分鐘後冇再抽筋，大家鬆一口氣。
卓妮