為咗喺七一前凝聚和諧氣氛，各個政策局都有意無意將可以博到掌聲嘅政策，安排喺今個月尾公布，至於推行呢啲政策所需嘅撥款申請，就被迫排晒喺七月頭至七月中上財委會，否則就趕唔切喺立法會暑假休會前實施，結果搞到財委會要破天荒喺七月三日同十日連開長達八粒鐘嘅會議，馬拉松式審批各項大大小小嘅政府撥款申請，今次迪士尼擴建就係其中一個典型例子。

按照立法會嘅既定程序，如果政府想喺七月十日就迪士尼擴建向財委會攞錢，就必須喺本周初將建議提交經濟委員會「過冷河」，因此Rita一係就要求卿姐網開一面畀佢豁免有關通知期，一係就迫使Jeffrey喺行會拍板前預早安排開會，是但有一個人要做醜人。須知商務及經濟發展局過去同卿姐有過唔少牙齒印，多次被佢批評企圖繞過既定程序攞錢，雖然部分事件最後證明唔關Rita事，但相信佢點都唔想再辣㷫對方，惟有改向比較好相與嘅Jeffrey埋手。

「神秘議程」鬧笑話

其實政府喺行會拍板前要求立法會轄下嘅委員會預早安排開會，過往亦時有發生，例如早前嘅醫療融資以至最近嘅公務員減薪都係咁做，只要冇寫明係行會即將討論嘅項目，技術上就唔算洩露行會議程。不過Rita可能仲以為自己係公務員，做乜都寧緊莫鬆，因此先會鬧笑話，要求議員討論一項「神秘議程」，結果自招麻煩之餘，仲要累埋Jeffrey。