好似話戒毒學校正生書院咁吖，由於依家喺芝麻灣嘅校舍甩皮甩骨，地方又唔夠用，希望搵間安全啲、大啲嘅校舍，等學生可以安心讀書明理，改過自新做番個好人。點知政府拖咗兩年幾，喺冇諮詢過梅窩居民嘅情況下，將廢置咗嘅南約區中學交畀正生書院，搞到梅窩居民嗌到拆天激烈反對。

連澳門大學副校長何順文都睇唔過眼，佢表示，正生書院遷校爭拗，令梅窩居民受各方指摘唔公道，政府應創造溝通途徑，改善雙方關係。佢仲指出，事件反映港府嘅思維同埋管治上出現問題，權責、角色同埋監管嘅機制亦有不足。

真係一語中的，完全講出咗成件事嘅問題所在。正生書院遷校咁芝麻綠豆嘅小事，竟然愈演愈烈，完全因為政府處事無能。計功夫茶話齋，喺今次事件中，正生書院同梅窩居民兩邊都係受害者至真。

事關戒毒學校畢竟唔係一般學校，梅窩居民有疑慮係好正常嘅，唔可以太過苛責，你試吓將學校搬去禮賓府或政府總部隔籬，睇吓班高官又肯唔肯吖！

依家最大嘅問題係，你要說服梅窩居民接受戒毒學校，係咪應該先做足充分諮詢呢？係咪要先同居民溝通呢？係咪要先尋求共識呢？

弊在成個政府做嘢毫無章法可言，官員抱住多做多錯、唔做唔錯心態，一開始懶懶閒唔多理，個個閃得就閃。好嘞，到事件搞大咗之後，騎虎難下，成班官員就懶正義咁出嚟撐正生書院，更加激化咗梅窩居民同學校嘅矛盾。

唉，呢班高官劑劑如是，明明好小兒科嘅一件事，本來三兩下就搞得掂，最後都會變成場政治大風波。可見弱勢政府百事哀，成日話要構建和諧社會，點知政府根本就係製造矛盾紛爭嘅最大黑手。

遠嘅唔講，睇吓去年市區的士收費「短加長減」事件，咪又係衰在當局閉門造車，冇充分諮詢業界意見，唔考慮新界的士嘅利益，點紅點綠不特止，仲遲唔搞早唔搞，喺正經濟環境差到貼地嘅時候推出，卒之小事化大，搞到的士罷駛，又係一鑊泡收場。

講開又講，家陣校園濫藥事件無日無之，正生書院遷校單嘢仲唔快啲搞掂，學生就嚟冇地方戒毒啦。其實，冰凍三尺非一日之寒，有議員表示一早發現多間學校有學生吸毒情況，當時已向政府反映，弊在政府左耳入右耳出，唔積極處理濫藥問題。唔係功夫茶靠嚇，再咁落去，戒毒學校唔止梅窩有，總有一間喺左近都有之！