本文重點
前立法會議員張超雄牽頭嘅「正言匯社」尋日正式成立，借咗位於將軍澳路向四肢傷殘人士協會嘅會址做場地，呢個連張超雄都話隔涉嘅地方，無阻一班立法會泛民舊同事齊齊捧場，好似劉慧卿、李卓人、梁耀忠、何俊仁及梁國雄等都有現身，佢班公文袋黨友更加空群而出，黨魁余若薇、主席關信基及新丁議員陳淑莊等齊齊到賀。
大女笑容滿面捧場
相信再多人捧場，都唔及太太同囡囡盈盈出席支持咁溫暖。張超雄嘅大女雖然有嚴重智障，但全程笑容滿面，仲不時拍手掌戥爸爸開心。至於大仔同二女，張超雄就話佢哋都喺香港，但無大女咁黐佢，無嚟到。其中一位公文袋立法會議員致辭時，仲直指張超雄係個麻煩人，唔單止喺立法會唔合作，喺公民黨開會時都好麻煩，有時叫佢支持吓，佢都話唔得。
早前譚香文退黨，唔少人都估下一個係張超雄，但仲係執委嘅佢話無諗過，仲話Mandy退黨係個人決定，同佢成立正言匯社無關；當然佢自立門戶係咪為退黨鋪路，就要睇落去至知。記得譚香文批評過公文袋精英心態嚴重，張超雄都深有同感，話公文袋無社區樁腳，做地區工作比較困難，仲令人有精英主義、難以落地嘅感覺，所以佢希望靠自己努力，做好地區工作。