好醜命生成，有時食幾多着幾多都係整定，好似以政務官D4級署任D6級社會福利署署長嘅余志穩，雖然英文名叫Fisher，但無條魚咁優游自在，天生騾仔命，做官多年，瓣瓣棘手嘢都上晒身，例如賭波、博彩稅、種族歧視、跨區交通津貼、兒童發展基金、社會企業等，份人工搣出來有血有汗，但最後仲要打回原形以首長級D4退休。Fisher八月就會退休，但佢就話要去做義工，學王永平咁去大學教書，辛苦得嚟有意義。
Fisher尋日出席一個活動時話，八月先至退休，仲未諗去邊間大學教書，但辛苦咁耐，一定會同家人去旅行歎吓輕鬆吓，地點就選東南亞國家，但我哋再想問詳細啲，佢就話詳情遲啲先至公開交代。同場仲有劉慧卿，卿姐自爆話今個星期同Fisher食飯餞行，而對上一次餞別嘅官員就係前房屋及規劃地政局常秘梁展文，佢話會不厭其煩忠告Fisher退休後唔好做一啲令公眾憤怒、尷尬同有利益衝突嘅事情。