醫管局主席胡定旭早前搭飛機去北京公幹時，迎面見到一個向佢打噴嚏嘅外籍旅客，搞到佢即刻要調位保持距離，因為擔心如果有同班搭客中招而被隔離，醫管局就少咗位抗疫主帥；不過隨着疫情在社區擴散，港府已放棄追蹤飛機患者附近嘅乘客。講開隔離患者、緊密接觸者呢招策略，英文叫「Quarantine」，背後仲有一段好有意義嘅抗疫歷史添。
「Quarantine」這個字原來係源自意大利文中嘅字「Quarantena」、即係四十日嘅意思。話說十四世紀歐洲爆發咗一場鼠疫，導致全球七千五百萬人死亡，唔少國家都為呢個病好頭痕，不斷諗辦法阻止疫情持續爆發，其中意大利就將鼠疫患者隔離四十日，藉以控制疫情，所以呢個政策取名為「Quarantena」。
食衞局高官話，本港由五月一日有首宗外地傳入個案，至本月十日出現首宗本土爆發後逐步放棄隔離政策，咁啱得咁蹺，前後都係相隔四十日，莫非七百年前意大利爆發鼠疫時，已預兆到今日嘅香港要面對呢場豬流感疫症？