全家都係基督徒嘅肥亨話，今日係星期日，最好嘅父親節活動，就係一家大小去做見證，食飯慶祝呢類塵世事，由囡囡安排，佢任由差遣咁話。相反，張建東今日約實兩個女食晚飯，連邊個付帳請客都諗好晒：「兩個女都大嘞，斷估唔會由我埋單嘞啩！」Mose今年父親節喺外地度過，尋日佢喺香港會食完午飯，就趕去機場飛去紐約，出席女兒獲當地律師行聘用嘅入職儀式，順便喺美國過父親節。豬流感肆虐美國，Mose話會做足措施，準備喺飛機上全程戴口罩，唔擔心會帶菌返香港。

夏太（左）爆料話啲仔女今晚會返晒屋企，畀驚喜夏佳理。	今日係父親節，簡炳墀（左）、簡永輝（右）拍住上鏡。	蔣麗芸（右）話，蔣家年年一家大細為蔣老（左）慶祝父親節，節目仲係年年不同。 （溫國佳攝）

仔女返晒嚟 阿Ron甜到漏

港交所主席夏佳理（Ron）亦係一名富貴爸爸，佢初時故作神秘，做出策騎揮鞭姿勢，話今晚嘅活動，「咪跑馬囉」。夏太夏安麗不值老公講到班仔女咁無孝心，踢爆班仔女今晚會返晒嚟，畀個驚奇阿Ron，阿Ron即時笑容甜到漏。

愛吃炆牛腩 蔣老有口福

卓妮上星期喺一個展覽上，見到全國政協委員蔣麗芸（Ann）陪爸爸工業家蔣震睇展覽。阿Ann話，今晚除長居外國嘅大家姐外，六兄弟姐妹都會一齊陪爸爸，女婿、新抱連孫仔孫女，三十幾人聚集三妹蔣麗萍屋企，過一個熱鬧父親節；爸爸最鍾意食牛腩，三妹會親自落廚，炮製最拿手嘅炆牛腩，相信蔣老今晚會好有口福。

聽Ann講，蔣家上下年年一齊慶祝父親節，節目年年不同，有一年包旅遊巴作香港一日遊，有次就拉大隊入大嶼山遊山玩水食海鮮，今日下午會去港島南區海灘游水。

牙擦擦嘅前練馬師簡炳墀今年有電視台搵佢拍父親節特輯，搵埋去年喺立法會選舉跟住自由黨前主席田北俊出選新界東嘅「簡仔」簡永輝上鏡。食力簡有兩子兩女，唔係律師就係銀行行政人員，佢話今晚仔女請佢去九龍半島酒店食粵菜，年年仔女又會送手錶、皮包畀佢，但最開心嘅莫過於見到仔女生性唔學壞，「個個有瓦遮頭」，咁就安樂晒喇。食力簡呢句話，道盡天下父母心！

卓妮