呢嗱，葵涌石梨坑村就有笪咁嘅「名勝」嘞，嗰度頹垣敗瓦，鐵皮、木板、磚頭以及雜物堆到一地都係，唔講仲以為係古戰場，特登留番喺度畀人憑弔添。

原來嗰度三月底發生咗場火警，當時有三間村屋燒通頂，村民痛失家園不特止，最慘係事隔咁耐，現場依然冇人清理，成地都係灰燼雜物，大熱天時曬一曬，簡直臭到不堪，時不時仲有老鼠走嚟走去，災場成個垃圾崗咁，附近居民濕滯咯，要自己掛幅紗網擋臭。

本報向消防處、地政總署、民政事務總署以及食環署等一大抽政府部門查詢過，不如一齊睇吓佢哋將個波踢嚟踢去嘅本領吖。

消防處話佢哋撲熄咗大火之後，會將現場交番畀事主或者在場嘅警務人員接管；民政事務總署就話冇收到居民嘅投訴或者求助。但講到腳法最叻嘅，相信非食環署莫屬嘞，該署話佢哋唔負責災場嘅清理工作，於是一腳將個波踢咗去地政總署。

話就話搵到要負責嘅部門，不過又有乜用吖，講到調整薪酬呢啲切身利益，公務員就話反應快啫，之但係要幫小市民做嘢，就你急佢唔急，拖足兩個月都冇人理。直至收到本報嘅查詢，地政總署先至話安排咗承辦商喺六月初進行清理行動，係都要踢一腳至郁一郁，證明佢哋非不能也，實不為也。

正如傳染病專科醫生勞永樂話齋，火警發生後如果唔及早清理，災場瓦礫好易成為老鼠嘅藏身之所，而且咁多雜物堆晒喺度，好易惹起蚊患，而且啲屋燒剩個架，容乜易隨時冧落嚟壓親人㗎。

講起政府部門卸責，呢單只不過係冰山一角。去年六月底颱風「風神」襲港後，元朗七星崗村有一棵差唔多三層樓高嘅大樹，半邊樹幹被強風吹到打橫冧落路中間，食環署和地政總署呢兩個懶到出汁嘅部門你推我讓，拖足三個月都冇人清理棵樹。唉，清理一棵樹啫，因乜事要搞咁耐？原因一字咁淺，咪就係「懶」囉！

不過功夫茶要講句公道話，成班懶官都有落力嘅時候，好似話佢哋耐不耐空群而出大搞清潔騷，都乾淨過一日㗎，只係唔使幾日，好快又打回原形之嘛。

唔怪得香港到處都係垃圾崗喇。呢嗱，去年十月喺深水埗廣利道有十一部電單車被焚毀，殘骸喺路邊大半年都冇人清理。政府成日叫人要清理積水防蚊患，但講一套做一套，任得爛車車胎積水養蚊叮人，認真靠害！

鬼咩，成班懶官鬥唔做嘢，搞到香港污糟邋遢兼危機重重，豬流感來勢洶洶唔係講玩㗎，如果再咁落去，成個香港變成廢墟都有之呀，到時真係搵鬼嚟咯！