議事堂係市民授權立法會議員議政嘅地方，莊嚴神聖，不過高官、議員喺議事堂做出唔尊重行為，時有所聞，之前有前教育統籌局局長李國章開會打機，今日就有公民黨梁家傑公然瀏覽Facebook，對着Facebook一個着住低胸小背心嘅妙齡少女照，盡情瀏覽咗接近十分鐘，到底版面上，邊一點令傑哥咁着迷？
立法會尋日開財委會，我哋發現當議員專心討論撥款申請時，梁家傑就一度將精神專注喺枱面上嘅手提電腦畫面，乜嘢咁吸引傑哥嘅眼球呢？咁睇真啲，係一個Facebook嘅版面，上面載有一張妙齡少女相片，畫面顯示，呢位少女姓劉，用簡體字寫，極有可能係內地網民；版面上仲有另外六位網民嘅照片，其中一張係傑哥黨友陳淑莊。不過我哋現場所見，傑哥似乎對劉小姐情有獨鍾，打開劉小姐張相片，足足維持有近十分鐘咁耐，佢可能係想睇真啲張相嘅每一個細節啦。
傑哥對住呢個版面，睇到喜形於色，期間一度望向隔籬位嘅同僚，笑容可掬，唔知係咪談論相中人，引起身後其他男議員注意，圍上去望咗兩眼，然後又好快咁閃開，陳淑莊就向畫面瞥咗一眼，就無理傑哥，唔知乜嘢意思。