磨拳擦掌開拓專業票源嘅工聯會近日四出拉客，繼早前為會計界成立工會後，尋日保險業總工會舉行新一屆理事就職禮，工聯會會長鄭耀棠除咗拉埋新上場嘅工聯會理事長吳秋北、前理事長黃國健、工聯小子潘佩璆及葉偉明等會內兄弟壯聲勢，仲搵來保監專員張雲正、從事保險業嘅行會成員陳智思撐場。
工聯會嘅勞工階層形象夠晒深入民心，但講到專業形象，明顯輸畀其他政團，為咗走出條新路，工聯會骨幹成員近年刻意同專業界別行近啲，尋日拉隊撐場就係最佳例子。無他嘅，為工聯會未雨綢繆開拓票源，好過等到下屆立法會選舉先嚟掘井喇！新理事長吳秋北深諳呢個道理，尋日主動四出派卡片，仲為新理事監誓，但秋北畢竟係新丁，帶領宣誓時顯得戰戰兢兢，事後問番佢係咪怕醜怯場，佢笑住擰頭話：「緊張？我冇呀！我驚讀錯名之嘛！」佢又話，上任理事長後唔係首次為團體監誓，點會「騰雞」喎。
講開吳秋北，其實佢已經有三個仔女，分別讀緊幼稚園及小學，近日小學停課，佢都要幫手湊仔，嚟緊暑假仲打算帶仔女出門旅行，可惜周圍都係豬流感火頭，齋諗地點已令佢好頭痕！