立法會主席尋日宴請一眾司局長、行會成員及三十多位立法會議員喺立法會開餐，呢類飯局一向政治味濃。座位話就話係抽籤，但幾乎每圍枱都有來自唔同政黨嘅議員，梅花間竹，聲音夠晒多元化。其中議員陳偉業（大舊）最激，趁機捉住同坐主家席嘅煲呔曾打小報告，矛頭直指施政一塌糊塗嘅食物及衞生局局長周一鑊。
卓妮尋日都貢咗去睇熱鬧，豎起隻耳聽到唔少八卦。大舊力插周一鑊「施政有問題」，批評佢施政漠視民意，激起民怨怒不可遏，好似停課安排就係例子；佢仲叫煲呔曾小心，擺明寸佢管治下屬不力。周一鑊被編排坐另一圍，聽唔到自己畀人寸。
煲呔曾又亂噏
不過大舊嘅說話肯定擊中埋煲呔曾「死穴」，令佢思緒混亂埋。話說當大舊轉話題談論近日有大型財務公司搵收數佬淋紅油，向債仔追數，甚至騷擾埋無辜嘅推薦人，煲呔曾竟然話：「咁下次叫佢哋（債仔）喺推薦人一欄上寫上禮賓府喇！」呢句話真係夠晒無厘頭，叫人亂填「禮賓府」三個字，咪等於叫人虛報資料？簡直係噏得就噏，完全係佢作風。其實煲呔曾亂噴口水已唔係第一次，早前佢揚言自己代表香港人發言，結果影響佢民望下滑。
不過，教育界張文光把握機會為正生書院請願，將一封合共有三十五位議員聯署支持嘅信件遞畀煲呔曾，之後佢仲捉住保安局常秘張琼瑤傾談學生自願驗毒計劃，叫政府喺九月開學前做好配套設施，咪搞到倒瀉籮蟹，轉頭再向財爺揼心口，要求撥款支持社福機構推展戒毒工作。
李少光玩快閃
正生書院話題成為飯局焦點，但有份主理事件嘅李少光就來一招沉默是金，不作回應。同枱食飯嘅劉江華一於咬住唔放，追問光哥有關紀律部隊準備上街抗議減薪一事，光哥同劉江華話，食完飯後會落樓同記者講呢個問題，可惜光哥食到一半就快閃，未有再出現。
高官一族中睇怕只有勞工及福利局局長張建宗最得閒，拉住立法會議員林大輝行埋一邊吹水，原來張局長剖白做官感受，話二十一歲大學畢業後就加入政府行列，一做就三十幾年，最難忘係八三年擔任前港督尤德嘅助理私人秘書，見證中英前途談判喎。
卓妮