旺角再次驚現鏹水彈狂徒高空轟炸，襲擊現場係奶路臣街同西洋菜街交界，最少有廿四名無辜小市民受傷。功夫茶強烈呼籲旺角街坊，行騎樓底戴鋼盔！

計計埋埋，淨係旺角，今次已經係第三單鏹水彈襲擊途人事件，同樣圍繞西洋菜街一帶。如果計埋天水圍嗰一鋪，半年內總共有四單。咁搞法，香港會唔會變成鏹水彈之都㗎？

咦，咪住先，又話安裝俗稱天眼嘅閉路電視緝兇嘅？今次影唔影到冷血狂徒呢？哦，對唔住，雖然裝好，昨日已啟用，仲有一個問題，即使啟用天眼，仍然未必有用，事關閉路電視係裝喺栢裕商業大廈，以及荷李活商業中心嘅天台，功夫茶睇睇地圖，好似覆蓋唔到奶路臣街喎。

唉，諗諗吓，呢鋪大劑嘞，鏹水彈狂徒擺明係故意挑釁。你未裝好天眼吖嘛，你裝天眼嘅位置又唔係奶路臣街吖嘛，狂徒一於神出鬼沒打游擊，殺你一個措手不及。

會唔會係唔同嘅人做嘅呢？都有可能㗎，潮流興抄襲吖嘛，不法分子有樣學樣，一啲都唔出奇。

無論如何，拜託警方，唔該神勇幹探及早破案，快手快腳將鏹水彈狂徒繩之於法。你知啦，旺角出名多人，如果有邊個咁唔好彩直中頭獎，後果真係不堪設想咯。

話時話，旺角第一次出事已經係舊年十二月嘞，事隔半年查唔查到乜嘢線索？至於第二次咯喎，係上個月嘅事，曾蔭權又去巡視過現場，鑑證科又重組過案情，警方仲加碼懸紅六十萬緝兇添，有冇乜嘢頭緒呢又？嗱嗱嗱，你唔好話一籌莫展呀，即使功夫茶肯放過你，全港市民尤其係旺角街坊，絕對唔會收貨。

講開懸紅，原本係十萬嘅，後來加到三十萬，最近再加到六十萬。睇嚟，假如鏹水彈狂徒係同一個人，呢條友仔好想知道自己嘅「身價」可以去到邊一個級數。你知啦，有啲犯罪分子好變態㗎，你懸紅愈多，佢愈覺威風。

喂，唔好忘記天水圍都有同類事件喎。五月尾，天富苑聚富閣有一班裝修工人開緊工，突然鏹水彈從天而降，灼到工人手腳出現血洞。比較特別嘅係，狂徒所用嘅強力通渠液，牌子同旺角兩單案係一樣嘅。好嘞，警方又有冇線索呀？天水圍街坊又使唔使行騎樓底戴鋼盔呢？

一次又一次，掟完又再掟，警方始終好似老鼠拉龜咁。計功夫茶話齋，警方真係要打醒十二分精神，進行一場神聖嘅眼眉保衞戰。喂，狂徒接二連三剃眼眉，如果兵捉唔到賊，警譽不保都仲係其次，市民輕則毀容，重則冇命，咁先至心寒呀！

所以話啫，警方為人為己，唔該盡速緝兇，功夫茶仲想去旺角行街街㗎！