近日一連幾間中學發生學生濫藥事件，反映政府多年來有關宣傳禁毒同打擊濫藥嘅工作真係講多過做。立法會前主席兼現任全國人大常委范徐麗泰，曾經做過理工學院（今為理工大學）助理院長同教育統籌委員會主席，尋日佢出席一個學生暑期實習團開幕式時，對近來校園濫藥嘅問題表現得格外關心，佢眼見莘莘學子沉淪毒海，心痛之餘都忍唔住要暗批警方打擊校園濫藥不力。
范太直言，禁毒工作唔係話攞啲錢出嚟就可以解決，最重要係用心，老師、社工要用心，家長更加要用愛去關懷。濫藥成風，政府自然責無旁貸，范太形容學生就好似小樹苗，日後就會生長成一棵撐起社會發展嘅大樹，所以政府依家如果唔好好糾正歪風，將來一定後悔莫及。
佢仲暗批警方禁毒未盡全力：「警方亦要出心，唔係話小問題就覺得唔緊要；如果萌芽時唔去處理，將來就會成為社會上嘅大問題。」連身為全國人大常委嘅范太都不吐不快，政府主責官員都好應該認真諗諗計啦！