政界就盛傳有一名極高級嘅港府官員早前上京訪問時，向阿爺勁篤煲呔曾背脊，究竟煲呔曾係咪可以做足餘下嘅任期，真係仍屬未知之數。

據聞該名高官向專責港澳事務嘅中央領導投訴，篤爆煲呔曾最近成日喺港府內部呻吟，話佢就算做好嘢啲市民都唔會讚佢，做錯小小事就會畀人鬧到拆天，連阿爺都鬧埋一份，所以不如乜嘢都唔做好過，完全違背佢當日競選時提出嘅「做好呢份工」承諾，任期未做夠一半就好似等緊退休咁。

事實上，煲呔曾政府近半年嘅表現，的確可以用「少做少錯，唔做唔錯」嚟形容，包括將政改、競爭法、公營廣播檢討、最低工資立法、以至醫療融資等重要政策，刻意押後到七一後再處理，對於鏹水彈同冧樹、冧鐵閘等突發事故，又淨係識得事後撲火補鑊，佢個人最為市民所記得嘅，就係先後喺立法會答問大會爆出「狗噏」同「代表論」等失言鬧劇。就算冇呢位高官上京篤佢背脊，阿爺自己都應該有眼睇！

不過話時話，呢位政府極高層走到上北京篤自己老細，係咪另有企圖，想自己仕途更上層樓呢？