近年每逢同民主有關嘅大事發生，有民主阿婆之稱嘅前政務司司長陳方安生都會出嚟抽水搭嗲。六四剛過，七一又至，陳老太尋日出席一個籌款活動，講起煲呔曾嘅六四論能否代表港人仲大義凜然，不過被問到今年遊行仲去唔去恤髮，佢當堂面黑，即閃。
陳老太首先大讚十五萬人參加燭光晚會充分展現香港嘅言論同集會自由，之後就話中帶刺明窒煲呔曾：「我哋唔可以因經濟淡化六四……作為特首，最重要係六四或者其他民主、自由、民生議題都要第一時間掌握同認同市民嘅觀點。」陳老太講六四講得咁慷慨激昂，但當晚維園有數以萬計市民手持燃點咗嘅洋燭，其中並唔包括佢在內，因為佢根本冇去。
被問起遊行，陳老太話今年一定會參加七一遊行，佢一直保持四萬笑容，但當記者追問時提到「恤髮」二字，佢先係一呆，然後就黑晒面嬲爆爆話：「吓？我上一次已經解釋過點解啦！」講完即閃。其實佢每次遊行都冇行到去終點政府總部，半路中途就算唔去恤髮，都會搭的士離隊，不過佢之前已經解釋過理由，唔肯再講嘞。