肥平冒雨都要撐場，皆因佢係呢間學院嘅「大媒人」。肥平解釋話，當年佢做藝發局主席時已有感香港缺乏藝術學院，心思思想搞番間，直至上任做局長後更力谷呢個構思，咁啱得咁蹺，浸大有意搞番間藝術學校，於是佢一於拉線將位於觀塘道嘅前空軍俱樂部，租畀浸大翻新成藝術教學基地，難怪浸大校長吳清輝致辭時叫班學生要飲水思源，點都要多謝呢位媒人。

肥平四年冇返過間學校，尋日一到埗就刮起一場大雨，認真係「貴人出門招風雨」！講番近況，佢話依家專注搞緊國民教育，嚟緊一期喺七月四日開班，討論中美關係；返到屋企，就專心湊女，囡囡係名校女拔生，九月升讀小三。問佢點睇近日有名校學生吸毒，肥平話唔想個女喺象牙塔入面成長，教女時唔會刻意避開話題，反而要畀佢知道社會有黑暗嘅一面，等佢學識分辨善惡喎。