負責審議兩項政府發債決議案嘅立法會小組尋日再次開會，獨立議員葉劉淑儀質疑，佢早喺廿幾年前讀書都學過，短過一年期嘅美國國庫債券叫做bills、一年至十年嘅叫做notes、長達十年以上嘅先可以叫bonds，即使係外匯基金同按揭證券公司發行嘅借款產品，都係叫做notes（票據）同debt（債務工具），依家港府計劃發行嘅借款產品，年期只有兩至十年，冇理由可以叫做債券，分明誤導公眾兼當議員係白癡！

議員憂濫用借款

議員劉健儀同何俊仁又批評發債決議案嘅條文寫法好唔清晰，例如政府把口就講話今次發債純粹係為咗推動發展本地債市，但又唔肯將呢個政策目標白紙黑字寫落決議案，令人憂慮政府將來一旦出現嚴重財赤，會出爾反爾濫用呢批借款嚟幫庫房填氹。政府又話會將借番嚟嘅錢擺落外匯基金一齊投資，但決議案卻完全冇交代借款嘅投資方法，令人擔心政府會將筆錢亂咁用嚟炒嘢，最後要納稅人科水幫政府還錢。

出席會議嘅財經事務及庫務局官員，開頭死都唔肯講點解堅持要用債券呢個名，但最終就畀金管局嘅同事踢爆，原來政府係擔心一旦將擬設嘅債券基金（Bond Fund）正名做債務基金（Debt Fund），可能會令外國評級機構以為港府好唔掂，急須舉債救亡。政府又話為免引起法律訴訟，最多只會喺決議案註釋交代發債嘅政策目標，唔會正式寫入條文裏面，同有啲銀行將啲警告字眼寫到蚊螆咁細隻、博啲小投資者睇漏眼嘅手法同出一轍。

最離譜係政府仲逼迫立法會趕喺今個月內通過有關決議案，連開多兩次會傾清楚啲都唔得，不僅當班議員係橡皮圖章，直情當佢哋係人肉印鈔機。