許華傑傳授打工竅門

卓妮尋日都貢去湊熱鬧，見到青聯主席許華傑（Michael），捉住問佢北上打工有乜竅門？Michael屋企喺內地有製衣廠，多年前已北上闖天下，佢話內地交際應酬多，幾大要練好酒量；如果明知酒量淺唔飲得，就要事先聲明，否則飲一杯唔飲一杯，好唔畀面。除咗酒量，佢話仲要識睇眉頭眼額，事關內地注重論資排輩，宴請政商界朋友時千祈咪搞錯座位，一句講晒就要學識入鄉隨俗，融入內地文化。

尋日嘅活動請到全國人大常委范徐麗泰和香港青年事務委員會主席陳振彬做主禮嘉賓，范太囝囝范駿華係香港青聯常董，尋日都有現身。

鄭志剛「科水」增加內地實習名額，等多啲本地大學生有機會北上見識。	許華傑笑言北上打工首要係練好酒量。	黃夢瑩（左）同邱詠麒齊組「菁英幗聚」。 （嚴少阡攝）
傅明憲搵人用閃石喺電話背面貼上愛犬個樣。

黃夢瑩組「菁英幗聚」

講起搞青年活動，「菁英會」班姐妹都唔執輸。尋日Michael太太黃夢瑩（Monin）宣告成立精英女性組織「菁英幗聚」，拉埋班執委包括名媛傅明憲（GiGi）、富豪邱德根孫女邱詠麒（Josephine）及全國政協委員劉漢詮千金劉佩炘等人亮相，擺明要威番次畀男人睇。Monin話，嚟緊會送出獎學金畀低收入女性，又同理大合作挑選社會上有卓越成就嘅女性接受領袖培訓，擺明叫姐姐妹妹站起來！

GiGi宣告要同男人劃清界線，唔肯講同莊氏集團太子爺莊家彬嘅戀情；卓妮追問又有雜誌影到佢同男士嘅親熱照，佢仲即時耍手擰頭話唔講感情事，唔通想疊埋心水做女強人？邱家淑女Josephine就話專心發展事業，依家幫手打理家族喺內地嘅酒店業務，位於上海浦東、成都及中山嘅酒店年底陸續開幕，要頻頻中港兩地飛。Josephine坦言金融海嘯下，唔少大公司為慳錢，禁止員工出差時住五星酒店，令生意難免受影響。

卓妮