遊客住度假村係咪最荒謬呢？未算，本報記者有驚人發現，原來只要遊客肯屈就，鐵皮寮屋都有得住。
話說上水區近日出現好多「賓館套房」嘅招租廣告，上面淨係有電話號碼，竟然冇招牌同埋地址。見佢咁古靈精怪，天職係查找真相嘅記者就假扮租客打電話問吓啦。經過一輪神神秘秘嘅交涉，終於有人帶記者穿過上水圍大元村，去到一處被鋅鐵包圍嘅寮屋，帶路嘅人就話嘞：「呢度就係賓館！」
呢間所謂賓館，裏面充滿油漆氣味，地上放晒裝修廢料。而所謂嘅套房，基本設施例如冷氣、床鋪、枱櫈、電視係有嘅，不過非常陳舊，最惡頂嘅係傳出陣陣霉爛味。勇闖異域嘅記者仲要付出好沉重嘅代價，佢兩隻腳慘遭蚊蟲咬到紅紅腫腫！
鐵皮寮屋又殘舊、又簡陋、又發臭，租金當然唔可以收得太貴，兩舊水一晚，經濟又實惠。時租都得，兩粒鐘一百蚊。其實，租金幾平都冇用，因為功夫茶腦海即時浮現一連串童年回憶：嘩！石硤尾寮屋大火呀！嘩！茶果嶺寮屋大火呀！嘩！鑽石山寮屋大火呀！
即係咁，寮屋扮賓館，消防設施唔慌好得去邊。事實上，賓館之所以要領牌，無牌唔可以經營，其中一個最重要嘅考慮就係防火安全，你唔符合消防條例咩？你咪使旨意攞牌。
好嘞，記者放蛇完畢，亦都可以話餵蚊完畢，梗係通知民政事務總署跟進㗎啦。哈哈，原來香港官僚好搞笑，唔去做諧星真係嘥料。民政事務總署話喎，派人去睇過㗎嘞，之不過咁，當時冇人喺裏面，所以冇入去調查，未知係咪有人非法經營賓館。打個譬喻，警察捉賊，係咪見到賊竇冇人就唔去捉呢？
更加搞笑嘅係，用嚟扮賓館嘅寮屋原來係屬於政府㗎，不過一直被佔用。唔知特區官僚點諗，如果功夫茶有一間屋，居然被人佔用咗，鵲巢鳩佔嘅人居然又收租圖利，功夫茶肯定會無地自容，想死嗰隻。
話時話，全香港有幾多間無牌賓館？講出嚟嚇死你，據業內人士估計，目前無牌經營嘅賓館多達幾百間，數目差不多等於有牌賓館。講過啦，無牌賓館最得人驚嘅係消防設施不足，一個唔覺意，一場無情火，唔知幾多人要變燒豬。
旅遊界立法會議員謝偉俊就講得啱嘞，香港嘅二、三星級酒店不足，導致無牌賓館問題嚴重，但係長期缺乏監管，主要原因係香港冇一個旅遊局負責所有旅遊事務，結果政府部門各自為政。
無牌賓館多成咁，危機重重官不管，功夫茶可以想像得到，再係咁發展落去，莫講話佔用嘅鐵皮寮屋可以出租，遲早有人指住天橋底同你講：「呢度就係賓館！」