前幾日開始坐正做香港律師會會長嘅王桂壎，尋日帶埋新副會長葉德禮出嚟同傳媒打招呼。上任後曾經自爆無乜大計嘅王桂壎，尋日其實唔單止打招呼咁簡單，佢直情抓緊業界關注嘅問題出招，反應之快真係好值得特區政府學習。
好似為咗幫業界尋找商機，非常熟悉內地情況嘅王桂壎話，本地律師喺內地最缺乏就係人際網絡，所以律師會理事會打算喺今年年中開始，每年同深圳市律師協會理事會開一次聯席會議，唔會再好似以往咁握手食飯就算數，仲呼籲業界先放眼最近香港嘅泛珠三角地區先啦！
除咗幫業界，佢亦出招幫埋市民，譬如針對好多時以「不成功、不收費」作招徠嘅意外索償代理問題，王桂壎一上任就宣布律師會會整條電話熱線，幫助市民了解索償問題。佢仲打埋友情牌，搵咗一百五十位有相關經驗嘅執業律師，義務提供至少一個鐘嘅法律諮詢服務，條熱線會喺周一至周五、辦公時間運作，仲有真人接聽，打電話去嘅市民留低個人資料同聯絡方法，一個工作天內就有律師聯絡。其實佢不但唔係冇乜大計，反而係抱負多多至啱。