本文重點
將於八月離任嘅科技大學校長朱經武曾經講過，香港只係佢第四個家，對香港嘅感情只係建基於科大和師生關係，雖然朱校長懷着這種過客心態，但仍恨鐵不成鋼，對港府感到失望。朱校長早前以宏觀角度公開批評港府對科研發展資源投放不足後，尋日又以微觀角度批評香港道路交通標誌不清晰，導致來港工作八年，都唔夠膽開一次車。
道路亦太窄
朱經武貴為物理學家，專門研究高溫超導體，多年來喺國際上取得卓越成就，思路相當清晰，相信日常生活無乜嘢難到佢，但偏偏嚟到香港，就畀政府部門嘅高超智慧設計嘅道路交通標誌考起。朱校長尋日同我哋講，來港前在美國已經擁有駕駛執照，本應嚟香港申請車牌輕而易舉，但佢反而唔敢喺香港開車，除咗香港與美國道路上落相反方向外，道路亦太過狹窄。
道路狹窄和上落相反方向等問題，世界各大城市都有機會出現，朱校長當然明白呢一點啦，所以佢最頂唔順就係道路交通標誌唔夠清晰。無論物理學家或科學家，一向大膽假設，小心求證，朱校長亦非隨口噏得就噏，根據長年累月觀察科大司機駕駛所得，好多時當離遠看到路牌時已經太遲，往往行錯路，相反美國道路較為寬闊，而且路牌指示清晰，好容易就找到目的地。
朱校長嘅總結係：在香港開車要好熟路至得，旨意路牌隨時要兜大圈遊車河，所以佢好佩服日日接載出入嘅科大司機咁叻可以記得晒啲路。其實朱校長所言非虛，本報《探射燈》去年已揭發運輸署設置道路指示牌亂點一通，誤導駕駛者選用車程較長嘅路線，部分路線甚至誘逼車主使用收費隧道，令駕駛者行多咗冤枉路，嘥油之餘，更令汽車排放更多廢氣污染環境。
咁都未算，運輸署仲縱容私人機構胡亂設置私人路牌，但路牌指示往往含糊不清、模棱兩可，變成道路危機，輕則累駕駛者行錯路，重則釀成交通意外。朱校長離任前本着一番好意提醒運輸署，係咪領情就自行決定，但因為道路標誌不清晰而嚇到人唔敢開車，確實損害香港國際形象。