香港真係一個不折不扣的動感之都，鬧市分分鐘有鏹水彈從天而降，警方為鎖定地點（不是鎖定狂徒）又模擬落咗幾十支鏹水彈，幾經測定，哦然謂曰：「係呢兩幢大廈啦！」老朽愚鈍，從地上濺出之鏹水痕迹，判斷到啲咩？難道啲鏹水彈係聰明導彈，識轉彎？
所以話香港有乜辦法唔充滿動力啊！嗱嗱嗱！好似港鐵車廂咁，上YouTube一睇，車廂內風光如畫，老朽以為西九文娛區率先搶閘：有容祖兒上身嘅學生哥手舞足蹈，口中唸唸有詞：來吧來吧來吧！又有猥瑣中年柱男騷，近乎要將支扶手磨成針；又有粗口阿嬸；又有狂挖鼻孔阿嬸；又有初中生當正自己係楊威用扶手大玩體操……一個車廂可以見到百樣人！
老朽多年前寫過一篇《給在車廂挖鼻的大佬》，其中一段話：「曾經在地車裏，見人剪腳甲、挖鼻屎、採耳油，也有西裝友用電鬚刨在剃鬚，有些大佬可能太無聊，或一排冇打麻雀，手痕起來，就用兩個﹃大餅』夾鬚根，還有些情侶，不惜彼此大揭瘡疤——大喇喇的在擠暗瘡；最離譜的，莫如見到一個麻甩佬，把手指尾變成電鑽，三百六十度的左右上下旋轉，當他成功挖出煤炭後，更細心欣賞一番，然後以大拇指使出一指彈功，嚇得坐在對面的我屁股懸空，雙腳橫伸。」
多年後，竟然地車阿嬸繼其業，見佢豪情自我，又挖又掏又摳又撩，地老天荒的要鑽個水落石出，那種至誠與情深，說不定令天地動容！當然，好多人當正「港鐵係我家」，老朽便經常見到有少女在車廂上大化妝：塗口紅掃胭脂，畫眼線捲眼睫毛，差點沒在車上剃腳毛，往腋窩噴香水而已！
看來，港鐵公司除了提醒客人「小心車門」、「不要在地車飲食外」，更要制訂一些禮儀守則，如「文明乘車，勿狂撩鼻屎」、「情到濃時，戒急用忍」之類，並多派人巡察，緝拿非法用扶手者！